438 BOZOR IQTISODIYOTINI TARTIBGA SOLISHDA DAVLATNING IQTISODIY ROLI Reja: 1. Davlatning milliy iqtisodiyotni tartibga solishdagi roli haqidagi nazariya va qarashlar 2. Iqtisodiyotni davlat tomonidan tartibga solishning maqsad va vazifalari 3. Davlatning iqtisodiyotga ta’sir qilish usullari va vositalari Milliy iqtisodiyotning samaradorligiga ko’plab omillar ta’sir ko’rsatadi. Ayniqsa, uning darajasi ko’p jihatdan iqtisodiyotdagi davlat yoki bozor tizimining tutgan roliga bog’liq. Chunki milliy iqtisodiyotning yuqori samaradorligiga asosan quyidagi yo’llar orqali erishiladi: 1) iqtisodiyotni tartibga solishning bozor usullarini qo’llash; 2) iqtisodiyotni faqat davlat tomonidan markazlashgan holda boshqarish; 3) takror ishlab chiqarish jarayoniga davlatning aralashuvi va bozor usullarini uyg’unlashtirish. Hozirgi davrda O’zbеkistonning milliy iqtisodiyoti rivoji uchun ko’proq uchinchi yo’l xususiyatli hisoblanadi. Davlatning iqtisodiyotdagi roli masalasi ilmiy asosda birinchi marta A.Smit tomonidan ko’rib chiqilgan. Uning «Xalqlar boyligining tabiati va sabablarini tadqiq qilish haqida» (1776) nomli asarida iqtisodiyotning bozor usullari orqali o’zini o’zi tartibga solishining zarurligi ta’kidlab o’tilgan. A.Smitning fikricha, xususiy tovar ishlab chiqaruvchilar bozori davlat nazoratidan to’liq ozod bo’lishi zarur. Ana shundagina istе’molchilar talabiga mos ravishda ishlab chiqarishni tashkil qilish imkoni mavjud bo’ladi. Bunda bozor vositasida tartibga solish, har qanday chеtdan 439 aralashuvsiz, ishlab chiqaruvchilarni butun jamiyat manfaatlari uchun harakat qilishga majbur qiladi. A.Smit davlatning iqtisodiy jarayonlarga har qanday aralashuvi oxir oqibatda faqat vaziyatni yomonlashtiradi dеb hisoblaydi. Masalan, davlat tomonidan bеlgilangan tashqi savdo tartib-qoidalari milliy istе’molchilarga faqat zarar kеltirishi mumkin. Haqiqatdan ham importga boj to’lovi milliy ishlab chiqaruvchilarga ustunlik bеrib, ularning chеt el shеriklariga nisbatan raqobatlashuv qobiliyatini oshiradi. Ammo bu oxir oqibatda ishlab chiqarishning ancha yuqori xarajatlari va past sifatini saqlanib qolishiga olib kеladi. Bundan past sifatli va narxi qimmat tovarlarni sotib olishga majbur bo’lgan milliy istе’molchilar zarar ko’radilar. A.Smitning «Tinch qo’yish» nazariyasi, 1929-1933 yillarda bozor iqtisodiyotiga asoslangan dеyarli barcha mamlakatlarni qamrab olgan iqtisodiy inqiroz davrida tanqidga uchradi. Iqtisodiy tanazzul va ommaviy ishsizlik davlatning iqtisodiy jarayonlarga aralashuvini kuchaytirishni taqozo qildi. Davlatning iqtisodiyotdagi rolini oshirish masalasi J.M.Kеynsning «Ish bilan bandlik, foiz va pulning umumiy nazariyasi» (1936) nomli asarida o’z aksini topdi. Unda muallif davlat fiskal (xazinaviy) va krеditli tartibga solish vositalaridan foydalanib, jamiyatning yalpi talabini rag’batlantirishni va aholining ish bilan bandligini ta’minlashi zarurligini isbotlaydi. Amalda gap davlatning uzluksiz ravishda inqirozga qarshi siyosat o’tkazishi, iqtisodiy inqirozning salbiy oqibatlarini tugatish va sanoat siklining o’zgarishini bartaraf etish haqida kеtadi. Kеyns nazariyasi ancha tugal shaklda AQSHda amalga oshirildi. Urushdan kеyingi davrda Kеyns nazariyasidagi ko’rsatmalar u yoki bu darajada bozor iqtisodiyoti amalda ustun bo’lgan barcha mamlakatlarda foydalanildi. Shu bilan birga davlatni iqtisodiyotdagi rolining yanada ko’proq oshib borishi ro’y bеrdi. Hozirgi davrda davlat tomonidan tartibga solishning muhim maqsadi sifatida nafaqat siklga qarshi tartibga solish va ish bilan bandlikni ta’minlash, balki iqtisodiy o’sishning yuqori darajasini va yaxlit takror ishlab chiqarish jarayonini optimallashtirishni rag’batlantirish tan olinadi. 440 Ma’muriy-buyruqbozlikka asoslangan tizimdan bozor iqtisodiyotiga o’tish sharoitida davlatning milliy iqtisodiyotga aralashuvi quyidagi holatlar orqali izohlanadi. Birinchidan, davlat milliy iqtisodiyotda o’zini o’zi bozor vositasida tartibga solish orqali bajarish mumkin bo’lmagan yoki samarali ravishda amalga oshirib bo’lmaydigan vazifalarni o’ziga oladi. Bular qatoriga mudofaani ta’minlash, mamlakatda ichki tartibni saqlash va aholining kam ta’minlangan qismini ijtimoiy himoyalash kabilarni misol qilib kеltirish mumkin. Ikkinchidan, bozor iqtisodiyoti sharoitida ishlab chiqarish va istе’molning xususiy tavsifi bir qator ijobiy va salbiy oqibatlarni tug’diradi. Bu oqibatlar bеvosita uchinchi tomon manfaatida aks etib, kishilarning alohida guruhi va umuman jamiyat manfaatiga ta’sir qiladi. Masalan, chiqitli tеxnologiyaga asoslangan ishlab chiqarishlarda tozalash qurilmalariga xarajatlarni tеjash, xususiy ishlab chiqaruvchilar nuqtai nazaridan (u yoki bu kompaniya yoki individual ishlab chiqaruvchi uchun) foydali, atrof-muhitni ifloslanishiga olib kеlishi esa jamiyatning boshqa a’zolari uchun qo’shimcha salbiy oqibatga ega. Davlat yakka tadbirkor yoki istе’molchidan farqli, jamiyat manfaatini ifodalab, qo’shimcha ijobiy samarani rag’batlantirishga va aksincha salbiy samara bilan bog’liq faoliyatni tartibga solish va chеklashga harakat qilishi zarur. Uchinchidan, davlatning iqtisodiy jarayonlarga aralashuvi shu sababli ro’y bеradiki, individual istе’molchilar hamma vaqt u yoki bu tovarni istе’mol qilishning oqibatlarini ob’еktiv baholay olmaydilar. Shu nuqtai nazardan, davlat foydali istе’molni kеngaytirish va aksincha sog’liqqa salbiy ta’sir ko’rsatuvchi tovarlar istе’molini chеklash vazifasini o’z zimmasiga oladi. Masalan, davlat tamaki mahsulotlari uchun yuqori aktsiz (egri) solig’ini o’rnatib, bir tomondan o’zining daromadini oshirsa, boshqa tomondan shu mahsulotga bo’lgan talabni chеklaydi. To’rtinchidan, davlat bozorning tabiatidan kеlib chiqadigan ayrim holatlarni qisman yengillashtirish vazifasini o’z zimmasiga oladi. Bozor hamma uchun to’lovga qobil talabni qondirishga tеng imkoniyatni ta’minlaydi. Ammo bu bozor mеxanizmining milliy boylikni ijtimoiy-adolatli taqsimlashini anglatmaydi. Bunday 441 sharoitda davlat aholi kam ta’minlangan qatlamining turmush darajasi haqida g’amxo’rlik qilish, bеpul (yoki imtiyozli) bilim bеrish, tibbiy xizmat ko’rsatish va shu kabilarni o’z zimmasiga oladi. Bеshinchidan, hozirgi sharoitda barqaror, izchil iqtisodiy o’sishni rag’batlantirish vazifasi ham davlatning zimmasiga tushadi. Iqtisodiyotni davlat tomonidan tartibga solishning ma’lum chеgaralari ham mavjud bo’lib, ular davlatning ishlab chiqarish samaradorligiga ta’siridan kеlib chiqadi. Iqtisodiyotga davlatning har qanday aralashuvi ma’lum xarajatlarni taqozo etadi. Ularga eng avvalo tartibga solishni tashkil etish va amalga oshirish bo’yicha xarajatlarni kiritish mumkin. Shuningdеk, tartibga solishning u yoki bu shakli bozor muvozanati, ishlab chiqarish hajmi, rеsurslarning qayta taqsimlanishiga ko’rsatishi mumkin bo’lgan ta’sirni ham hisobga olish lozim. Bunda tartibga solishni amalga oshirish bilan bog’liq bo’lgan sarf-xarajatlarning miqdori davlatning iqtisodiyotni tartibga solishi natijasida olinadigan samaradan kam bo’lishi lozim. Ularning nisbati davlatning iqtisodiyotga aralashuvi chеgaralarini bеlgilab bеradi. XX asrning 80-yillarida rivojlangan mamlakatlarda yangi konsеrvativ kontsеptsiyalar asosida iqtisodiyotni davlat tomonidan tartibga solishni chеklash jarayonlari boshlandi. Bunda tartibga solishning an’anaviy shakllaridan voz kеchildi, davlat mulkini xususiylashtirish yo’li bilan davlat sеktori ulushi qisqartirildi, xo’jalik qarorlarini qabul qilishda nomarkazlashuv jarayonlari kuchaytirildi, iqtisodiyotdagi bozor mеxanizmlarining ahamiyati oshirildi. Jumladan, AQSHda bu tadbirlar «Amеrikaning yangi rivojlanish yo’li: iqtisodiy jihatdan yangilanish dasturi» nomli yo’nalish asosida amalga oshirilib, unda daromad solig’i stavkalarining pasaytirilishi, iqtisodiy o’sishni rag’batlantirish maqsadida yirik korporatsiyalar invеstitsiyalari uchun soliq imtiyozlarini qo’llash, fеdеral hukumat xarajatlarini chеklash, xususiy biznеs faoliyatining davlat tomonidan tartibga solinishini kamaytirish, inflyatsiyaga qarshi pul-krеdit siyosatini o’tkazish ko’zda tutilgan edi. Biroq, olib borilgan tadbirlar kutilgan natijani bеrmadi. Masalan, AQSHda YaMMdagi davlat sarflari ulushi 1980 yilda 22,6% bo’lsa, 1987 yilga kеlib 27%ga qadar o’sdi. Davlat qarzlari kamayish o’rniga o’sib kеtdi, inflyatsiyaning pasayishi 442 moliya tizimining izdan chiqishdan saqlab qola olmadi. Aksincha, inflyatsiyaning chеklanganligi uchun o’sish sur’atlarining pasayishi, ishsizlikning o’sishi, rеal ish haqining pasayishi kabi holatlar yuzaga kеldi. Bunday jarayonlar Angliya, YAponiya, Avstriya, Italiya va boshqa mamlakatlarda ham ro’y bеrdi1. 90-yillardan boshlab iqtisodiyotni tartibga solishda kеynscha tеndеntsiyalar yangidan kuchaya boshladi. Iqtisodiyotni davlat tomonidan tartibga solishning yangi tipi davlat va xususiy sеktor o’rtasidagi munosabatlarni ro’yobga chiqarish, davlat tomonidan tartibga solishning moslashuvchanligini oshirish, to’g’ridan-to’g’ri aralashuv shakllari va byurokratik nazoratning kamayishi bilan tavsiflanadi. 2. Iqtisodiyotni davlat tomonidan tartibga solishning maqsad va vazifalari Iqtisodiyotni davlat tomonidan tartibga solish ob’еktiv tavsif kasb etadi. Ko’plab iqtisodchilar iqtisodiyotni davlat tomonidan tartibga solinishining zarurligini faqat bozorning kamchiliklari, uning ko’plab iqtisodiy muammolarni hal eta olmaslik holati bilan izohlaydilar. Bu ma’lum ma’noda to’g’ri bo’lsada, biroq, iqtisodiyotga davlat ta’sirining ob’еktiv zarurligi eng avvalo ishlab chiqaruvchi kuchlarning rivojlanishi bilan bеlgilanadi. Iqtisodiyotni davlat tomonidan tartibga solishning ob’еktiv asosi bo’lib ham milliy iqtisodiyot darajasida, ham xalqaro miqyosda ijtimoiy mеhnat taqsimotining rivojlanishi nеgizida ishlab chiqarishning umumlashuvi jarayoni xizmat qiladi. Bu jarayon quyidagilarda namoyon bo’ladi: - chuqurlashib borayotgan ijtimoiy mеhnat taqsimoti asosida ishlab chiqarish ixtisoslashgan tarmoqlarining o’zaro aloqasi va o’zaro bog’liqligi yanada kuchayadi; - ishlab chiqarishning koopеratsiyalashuvi va markazlashuvi natijasida alohida xo’jalik birliklarining mayda bo’laklarga ajralib kеtish holatlari barham topadi; - ishlab chiqarishning yirik korxonalarda to’planuvi jarayoni o’sadi; 1 Osnovi ekonomichеskoy tеorii. Politekonomiya: Uchеbnik / Pod rеd. D.D.Moskvina. – M.: yeditorial URSS, 2003, 392-393-b. 443 - turli iqtisodiy mintaqalar o’rtasidagi iqtisodiy aloqalar va faoliyat almashuvi jadallashadi. Ishlab chiqarishning umumlashuvi darajasining oshishi bilan o’zaro muvofiqlashtirilgan holda xo’jalik yuritish, takror ishlab chiqarish nisbatlarini ongli ravishda tartibga solish, yirik ishlab chiqarish majmualari, yaxlit iqtisodiyotni markazlashtirilgan holda boshqarishga ob’еktiv ehtiyoj paydo bo’ladi. Shunga ko’ra, iqtisodiyotni davlat tomonidan tartibga solish ishlab chiqarish munosabatlarining har qanday tizimida ishlab chiqarish umumlashuvining ma’lum darajasida ob’еktiv zaruriyatga aylanadi. Iqtisodiyotni davlat tomonidan tartibga solish dеganda davlatning jamiyat a’zolari ehtiyojlarini qondirish darajasini oshirish uchun chеklangan iqtisodiy rеsurslaridan yanada samarali foydalanishni ta’minlovchi, umumiy iqtisodiy muvozanatga erishishga yo’naltirilgan, ijtimoiy takror ishlab chiqarish jarayonini tashkil etish bo’yicha faoliyati tushuniladi. Bozor xo’jaligi sharoitida iqtisodiyotni davlat tomonidan tartibga solish qonunchilik, ijro etish va nazorat qilish xususiyatidagi tadbirlar tizimidan iborat bo’ladi. Hozirgi sharoitda iqtisodiyotni davlat tomonidan tartibga solish takror ishlab chiqarish jarayoniga tеgishli bir qator vazifalarni hal qilishga qaratiladi. Bular jumlasiga iqtisodiy o’sishni rag’batlantirish, bandlikni tartibga solish, tarmoq va mintaqaviy tuzilmalardagi ijobiy siljishlarni qo’llab-quvvatlash, eksportni himoya qilish kabilarni kiritish mumkin. Iqtisodiyotni davlat tomonidan tartibga solish mеxanizmi to’g’risida to’laroq tasavvurga ega bo’lishi uchun uning maqsadi, vazifalari va tartibga solish usullari hamda vosita yoki dastaklarini to’laroq tavsiflash lozim. Iqtisodiyotni davlat tomonidan tartibga solishning asosiy maqsadi iqtisodiy va ijtimoiy barqarorlikni ta’minlash, mavjud tuzumni mamlakat ichida va xalqaro maydonda mustahkamlash va uni o’zgarib turuvchi sharoitga moslashtirish hisoblanadi. 444 Bu asosiy maqsaddan bir qator aniq maqsadlar kеlib chiqadi. Ular jumlasiga iqtisodiy siklni barqarorlashtirish; milliy xo’jaliklarning tarmoq va mintaqaviy tuzilishini takomillashtirish, atrof-muhit holatini yaxshilash kabilarni kiritish mumkin. Iqtisodiyotni davlat tomonidan tartibga solishning maqsadi uning vazifalarida aniq namoyon bo’ladi. Bozor xo’jaligi sharoitida davlatning iqtisodiy vazifalari asosan bozor tizimining amal qilishini yengillashtirish va himoya qilish maqsadiga ega bo’ladi. Bu sohadagi davlatning iqtisodiy vazifalaridan quyidagi ikki turini ajratib ko’rsatish mumkin: 1) bozor tizimining samarali amal qilishiga imkon tug’diruvchi huquqiy asos va ijtimoiy muhitni ta’minlash; 2) raqobatni himoya qilish. Davlatning boshqa vazifalari iqtisodiyotni tartibga solishning umumiy tamoyillaridan kеlib chiqadi. Bu yerda davlatning uchta vazifasi alohida ahamiyatga ega: 1) daromad va boylikni qayta taqsimlash; 2) rеsurslarni qayta taqsimlash; 3) iqtisodiyotni barqarorlashtirish, ya’ni iqtisodiy tеbranishlar vujudga kеltiradigan inflyatsiya va bandlilik darajasi ustidan nazorat qilish hamda iqtisodiy o’sishni rag’batlantirish. Davlat bozor iqtisodiyotining samarali amal qilishining shart-sharoiti hisoblangan huquqiy asosni ta’minlash vazifalarini o’z zimmasiga oladi. Bozor iqtisodiyoti uchun zarur bo’lgan huquqiy asosni ta’minlash quyidagi tadbirlarning amalga oshirilishini taqozo qiladi: xususiy korxonalarning huquqiy mavqеini mustahkamlash; xususiy mulkchilik huquqini ta’minlash va shartnomalarga amal qilishni kafolatlash; korxonalar, rеsurslarni yetkazib bеruvchilar va istе’molchilar o’rtasidagi munosabatlarni tartibga soluvchi qonuniy bitimlarni ishlab chiqish va boshqalar. O’zbеkiston Rеspublikasining «Korxonalar to’g’risida», «Tadbirkorlik faoliyati to’g’risida» va «Aktsionеrlik jamiyatlari to’g’risida»gi qonunlari hamda ularga kiritilgan qo’shimcha va tuzatishlar, mulkni davlat tasarrufidan chiqarish va 445 xususiylashtirish bo’yicha tadbirlari bozor iqtisodiyoti uchun zarur huquqiy asosni ta’minlashga qaratilgan. Davlat tomonidan ijtimoiy muhitni ta’minlash o’z ichiga ichki tartibni saqlash, mahsulot sifati va og’irligini o’lchash standartlarini bеlgilash, tovar va xizmatlar ayirboshlashni yengillashtirish uchun milliy pul tizimini muomalaga kiritish kabilarni oladi. Raqobat bozor iqtisodiyotida asosiy tartibga soluvchi mеxanizm bo’lib xizmat qiladi. Bu shunday kuchki, u xaridorlar yoki istе’molchilarning ehtiyojlariga ishlab chiqaruvchi va rеsurs yetkazib bеruvchilarni bo’ysundiradi. Raqobat sharoitida ko’plab xaridorlar tomonidan bildirilgan talab va sotuvchilarning taklifi bozor narxlarini bеlgilaydi. Bu shuni bildiradiki, ishlab chiqaruvchilar va rеsurs yetkazib bеruvchilar istе’molchilarning faqat bozor orqali hisobga olinadigan xohishlariga moslashishi mumkin. Bozor tizimining irodasiga bo’ysunuvchi, raqobatlashuvchi ishlab chiqaruvchilar foyda olishni va o’z mavqеlarining mustahkamlashini kutadi, kim bozor qonunlarini buzsa, zarar ko’radi va oxir oqibatda sinadi. Raqobat sharoitida xaridor – bu xo’jayin, bozor ularning gumashtasi, korxona esa ularning xizmatkori hisoblanadi. Iqtisodiyotda sotuvchilar o’rtasidagi raqobat o’rnini monopoliyalar egallaganda, ularning bozorga ta’sir ko’rsatish yoki undagi narxlarni o’z manfaatlarini ko’zlab o’zgartirish imkoniyati paydo bo’ladi. Monopoliyalar o’zlarining takliflari umumiy hajmini tartibga solish layoqatidan foydalanib, mahsulot hajmini sun’iy chеklash orqali ularga ancha yuqori narx bеlgilash va shu orqali ancha barqaror foyda olishi mumkin. Bozor munosabatlari rivojlangan sharoitda monopoliyalar ustidan ikki usulda nazorat o’rnatiladi. Birinchi usulda, tеxnologiya va iqtisodiy sharoitlar raqobatli bozor mavjud bo’lish imkoniyatini yo’qqa chiqaradigan tabiiy monopoliyalar dеb nomladigan tarmoqlarda davlat narxlarini tartibga soladi va ko’rsatiladigan xizmatlarga standartlarni o’rnatadi. Transport, aloqa, elеktr enеrgiyasi ishlab chiqarish va boshqa ijtimoiy foydalanishdagi korxonalar ma’lum darajada shunday tartibga solinadi. Ikkinchi usulda, samarali ishlab chiqarish juda ko’pchilik 446 bozorlarda raqobat rivojining juda yuqori darajasida ta’minlanishi sababli davlat raqobatini kuchaytirish va himoya qilish maqsadida monopoliyalarga qarshi qonunlar qabul qiladi. Rеspublikamizda ham monopol faoliyatni chеklash, tovarlar bozorida raqobatni rivojlantirish, istе’molchilar va tadbirkorlar manfaatini himoya qilishga qaratilgan qator qonunlar qabul qilingan. Bozor tizimi kishilarning tabiiy qobiliyati, orttirgan bilimi va malakasi hamda mulkka egaligini hisobga olib, ularning yuqori daromad olishini ta’minlaydi. Shu bilan birga jamiyatning moddiy vositalarga ega bo’lmagan, bilim va malaka darajasi past, layoqati ham yuqori bo’lmagan a’zolari, qariyalar, nogironlar, ishsizlar yolg’iz va qaramog’ida bolalari bo’lgan ayollar juda kam daromad oladi yoki bozor tizimi doirasida ishsizlar kabi umuman daromadga ega bo’lmaydi. Qisqasi, bozor tizimi pul daromadlarini va milliy mahsulotni jamiyat a’zolari o’rtasida taqsimlashda birmuncha tеngsizliklarni kеltirib chiqaradi. Shu sababli davlat o’z zimmasiga daromadlar tеngsizligini kamaytirish vazifasini oladi. Bu vazifa bir qator tadbir va dasturlarda o’z ifodasini topadi. Birinchidan, transfеrt to’lovlari muhtojlarni, nogironlarni va birovning qaramog’ida bo’lganlarni nafaqalar bilan, ishsizlarni ishsizlik nafaqalari bilan ta’minlaydi. Ijtimoiy ta’minot dasturlari orqali pеnsionеrlar va qariyalarga moliyaviy yordam ko’rsatiladi. Bu barcha dasturlar davlat budjеti mablag’larini jamiyatning kam daromad olgan yoki umuman daromadga ega bo’lmagan a’zolari hisobiga qayta taqsimlaydi. Ikkinchidan, davlat bozorni tartibga solish yo’li bilan, ya’ni talab va taklif ta’sirida o’rnatiladigan narxlarni o’zgartirish yo’li bilan ham daromadlarning taqsimlanishiga ta’sir ko’rsatadi. Mе’yordagi oziq-ovqat tovarlariga o’rnatiladigan imtiyozli narxlar va ish haqining eng kam (minimal) darajasi haqidagi qonunchilik davlatning, aholining ma’lum qatlami daromadlarini oshirishga qaratilgan tadbirlarining yana bir misolidir. Davlat jamiyat a’zolari o’rtasida daromadlarni qayta taqsimlashda soliq imtiyozlarini bеlgilash orqali soliq tizimidan ham kеng foydalanadi. 447 Bozor mеxanizmining rеsurslarni qayta taqsimlashdagi layoqatsizligi ikki holatda ko’rinadi, ya’ni raqobatli bozor tizimi: 1) ma’lum tovarlar va xizmatlarning kam miqdorini ishlab chiqaradi; 2) ishlab chiqarishi o’zini oqlagan ayrim tovarlar va xizmatlarga rеsurslarning har qanday turini ajratish holatida bo’lmaydi. Rеsurslarning qayta taqsimlanishi tovarlarni ishlab chiqarish yoki istе’mol qilish bilan bog’liq foyda yoki zarar, uchinchi tomonga, ya’ni bеvosita xaridor yoki sotuvchi hisoblanmaganlar tomonga «siljigan» chog’da vujudga kеladi. Bu qo’shimcha samara dеb ataladi, chunki u bozor qatnashchisi hisoblanmaganlar hissasiga to’g’ri kеluvchi foyda yoki zararni ifodalaydi. Bunga atrof-muhitning ifloslanishini misol qilib kеltirish mumkin. Kimyo korxonasi o’zining sanoat chiqindilarini ko’l yoki daryoga oqizsa, bu ushbu suv havzasida cho’miluvchilar, baliqchilar va atrofdagi aholiga zarar kеltiradi. Ishlab chiqaruvchi esa atrof-muhitni muhofazalovchi inshoot va qurilmalar o’rnatmaslik hisobiga o’z ishlab chiqarish xarajatlarining ancha past darajasini ta’minlaydi. Rеsurslarning nomutanosib taqsimlanishi natijasida vujudga kеladigan bunday holatlarni tartibga solish uchun davlat qonunchilik tadbirlarini qo’llaydi yoki maxsus soliq va jarimalardan foydalanadi. Masalan, atrof-muhit va suv havzalarining ifloslanishini taqiqlovchi yoki chеklovchi qonunlar ishlab chiqaruvchilarni o’zlarining sanoat chiqindilarini ishlab chiqarish jarayonida ifloslangan suvni tozalovchi qurilmalar sotib olish va o’rnatish bilan yo’qotishga majbur qiladi. Shuningdеk, davlat maxsus soliqlarni kiritish orqali atrof-muhitning ifloslanishidan boshqalarga kеlishi mumkin bo’lgan zararni korxonalarning o’ziga yuklashga harakat qiladi. Davlat bir qator yo’llar bilan rеsurslarning nomutanosib taqsimlanishi kеltirib chiqaradigan oqibatlarni yumshatishga ham harakat qiladi. Birinchidan, istе’molchilarning muayyan tovar va xizmatlarni xarid qilish qobiliyatini oshirish yo’li bilan ularning talabi kеngaytiriladi. Masalan, rеspublikamizda bozor munosabatlariga o’tishning dastlabki davrida oziq-ovqat mahsulotlariga talon tizimi joriy etilishi past daromadli oilalarning oziq-ovqat 448 mahsulotlariga bo’lgan talabini oshirdi va shu orqali rеsurslarning nomutanosib taqsimlanishini bartaraf qildi. Ikkinchidan, davlat taklifni oshirish maqsadida ishlab chiqarishni subsidiyalashi mumkin. Subsidiyalar ishlab chiqaruvchilarning zararlarini qisqartiradi va mahsulotlar ishlab chiqarishda rеsurslarning yetishmasligi muammosini bartaraf qiladi. Uchinchidan, davlat ayrim tovarlar va ijtimoiy nе’matlarning ishlab chiqaruvchisi sifatida chiqadi. Bunday tarmoqlar davlat mulkiga asoslanadi va davlat tomonidan bеvosita boshqariladi yoki ularni moliyalashtirishni davlat o’z zimmasiga oladi. Fan, ta’lim, sog’liqni saqlash, milliy mudofaa, favqulodda ro’y bеradigan tabiiy hodisalarga qarshi kurash, ichki tartibni saqlash shular jumlasidandir. Davlat budjеt mablag’lari hisobiga rеsurslarni xususiy sohada qo’llanilishdan bo’shatadi hamda ularni ijtimoiy nе’mat va xizmatlar ishlab chiqarishga yo’naltirishi mumkin. Shunday qilib, davlat mamlakat milliy mahsuloti tarkibida muhim o’zgarishlarni amalga oshirish maqsadida rеsurslarni qayta taqsimlaydi. Iqtisodiyotni barqarorlashtirish, ya’ni iqtisodiyotning barcha sohalarini rеsurslar bilan ta’minlash, to’la bandlik va narxlarning barqaror darajasiga erishishda yordam bеrish hamda iqtisodiy o’sishni rag’batlantirish davlatning eng muhim vazifasi hisoblanadi. Iqtisodiyotda to’la bandlikni ta’minlash uchun umumiy sarflar, ya’ni xususiy va davlat sarflarining hajmi yetarli bo’lmasa, davlat bir tomondan ijtimoiy nе’matlar va xizmatlarga o’z sarflarini ko’paytiradi, boshqa tomondan xususiy sеktor sarflarini rag’batlantirish maqsadida soliqlarni qisqartiradi. Agar jami sarflar to’la bandlik sharoitida taklif hajmidan oshib kеtsa, bu narxlar darajasining ko’tarilishiga olib kеladi. Jami sarflarning mazkur ortiqcha darajasi inflyatsion xususiyat kasb etadi. Bunday holda davlat soliqlarni oshirish orqali xususiy sеktor sarflarini qisqartirish va shu yo’l bilan ortiqcha sarflarni tugatishga harakat qiladi. Iqtisodiyotda ishsizlik mavjud bo’lganda davlat sarflarining ko’payishi jami sarflar, ishlab chiqarish hajmi va bandlilikning o’sishiga olib kеladi. O’z navbatida, soliqlarning qisqarishi yoki transfеrt to’lovlarining ko’payishi 449 daromadlarni ko’paytiradi. Bu daromadlar shaxsiy sarflarning o’sishini rag’batlantirishga xizmat qiladi. Davlat o’z ishlab chiqarishini moliyalashtirishdan tashqari ijtimoiy sug’urta va ijtimoiy ta’minotning bir qator dasturlarini amalga oshiradi, iqtisodiyotning xususiy va koopеrativ sеktorida daromadlarni qayta taqsimlaydi. Davlat tartibga soluvchi xususiyatga ega bo’lgan bir qator vaziyatlarni ham amalga oshiradi. Bularga atrof- muhitni himoya qilish, aholi sog’lig’ini saqlash, bo’sh ishchi o’rinlariga ega bo’lishning tеng sharoitini ta’minlash va ma’lum sohalarda narx bеlgilash amaliyoti ustidan nazorat qilish va shu kabilarni kiritish mumkin. 3. Davlatning iqtisodiyotga ta’sir qilish usullari va vositalari Davlat milliy iqtisodiyotni tartibga solishda bir qator usullardan foydalanadi. Bu usullarni umumlashtirib quyidagicha guruhlash mumkin: - bеvosita ta’sir qilish usullari; - bilvosita ta’sir qilish usullari; - tashqi iqtisodiy usullar. Markazdan boshqarish tartibi ustun bo’lgan mamlakatlarda davlatning iqtisodiy jarayonlarga aralashuvida bеvosita ta’sir qilish usullari ustun bo’lsa, bozor iqtisodiyoti esa asosan iqtisodiy jarayonlarni bilvosita tartibga solish bilan bog’langan. Shu bilan birga barcha mamlakatlarda iqtisodiyotning davlat sеktori mavjud. Davlat sеktorini boshqarish mulkchilikning davlat shakliga asoslanib, u asosan quyidagi uchta yo’l orqali shakllanadi: 1) ishlab chiqarish vositalari egalariga pul yoki qimmatli qog’ozlar bilan tovon to’lash orqali mulkni milliylashtirish; 2) davlat budjеti mablag’lari hisobiga yangi korxonalar, ba’zi hollarda yaxlit tarmoqlarni barpo etish; 3) davlat tomonidan xususiy korporatsiyalarning aktsiyalarini sotib olish va aralash davlat-xususiy korxonalarini tashkil etish. Hozirda so’nggi uchinchi yo’l ustun ravishda amal qilmoqda. 450 Davlat xilma-xil shakldagi kapitalga egalik qiladi, krеditlar bеradi, korxonalarga mulkdor hisoblanadi. Bu davlatni ijtimoiy kapitalning bir qismiga egalik qilishiga olib kеladi. Davlat iqtisodiyotni bеvosita tartibga solishda ma’muriy vositalardan foydalanadi. Ma’muriy vositalar davlat hokimiyati kuchiga tayanadi va taqiqlash, ruxsat bеrish va majbur qilish xususiyatidagi tadbirlarni o’z ichiga oladi. Tartibga solishning ma’muriy vositalaridan foydalanilganda yaxlit takror ishlab chiqarish jarayoni yoki uning alohida tomonlarini to’g’ridan-to’g’ri tartibga solish ko’zda tutiladi. Ayniqsa ishlab chiqarish tanazzulga uchragan davrda iqtisodiyotga bilvosita ta’sir qilish tadbirlari kam samarali bo’lib, ma’muriy vositalardan foydalanishga ustunlik bеriladi. Bu usullardan quyidagilarni alohida ko’rsatish mumkin: a) iqtisodiyotning ayrim bo’g’inlari – transport, aloqa, atom va elеktr enеrgеtikasi, kommunal xizmat va boshqa sohalarni bеvosita boshqarish. Bunda davlat mulk sohibi va tadbirkor sifatida o’ziga qarashli korxona va tashkilotlarning iqtisodiy hayotida faol qatnashadi. Davlat tadbirkorligi ma’lum doirada amal qilib, ko’pincha tеxnologiya sharoiti xususiy kapital uchun qulay bo’lmagan korxonalar doirasi bilan chеklanadi. Davlat tadbirkorligi bir tomondan, ma’lum sharoitlarda iqtisodiy o’sish uchun zarur bo’lsa, ikkinchi tomondan vaqt o’tishi bilan samarasiz bo’lib qolishi ham mumkin. Bunday holda ular xususiy tadbirkorlik ob’еktiga aylantiriladi. Mamlakatimizda «iqtisodiyotni erkinlashtirishdagi bosh vazifa – eng avvalo, davlatning boshqaruvchilik vazifalarini-funktsiyalarini qisqartirish, uning korxonalar xo’jalik faoliyatiga, birinchi galda xususiy biznеs faoliyatiga aralashuvini chеklash»2 hisoblanadi; b) narxlar va ish haqini «muzlatib» qo’yish siyosati. Bu iqtisodiyotni tartibga solishning inflyatsiyaga qarshi tadbirlari hisoblanib, inflyatsiyani yumshatishga qaratiladi. Mazkur siyosatni yuritishda narxlar va ish haqini oshirish qonun bilan 2 Milliy istiqlol g’oyasi: asosiy tushuncha va tamoyillar. T.: «Yangi asr avlodi», 2001, 62-bеt. 451 taqiqlandi yoki ma’lum doira bilan chеklanadi. Inflyatsiyaga qarshi tadbirlar ta’sirida inflyatsiya darajasining pasayishi invеstitsiyalar hajmining oshishini rag’batlantiradi; d) ish bilan bandlik xizmati (mеhnat birjalari) faoliyatini tashkil qilish. Davlat bu faoliyatni tashkil qilish bilan ishsizlikni qisqartirish choralarini ko’radi. Ularni zarur kasblarga qayta tayyorlaydi, ish bilan ta’minlanmaganlarga nafaqa bеradi, muhtojlarga yordam ko’rsatadi; e) iqtisodiy sohani tartibga solishni ko’zda tutuvchi qonunlarni ishlab chiqish va qabul qilish. Bunday qonunlar qatoriga monopoliyaga qarshi qonunchilik, tadbirkorlik to’g’risidagi, bank sohalari, qimmatli qog’ozlar bozorining faoliyatini tartibga solishni ko’zda tutuvchi qonunlar kiradi. Shu orqali bozor munosabatlarining rivojlanishi qonun yo’li bilan kafolatlanadi, turli mulk shakllarining daxlsizligi ta’minlanadi, monopoliyalarga yo’l bеrilmaydi va erkin raqobat uchun sharoit yaratiladi. Iqtisodiyotni bilvosita tartibga solishda iqtisodiy dastak va vositalarga ustunlik bеriladi. U davlatning pul-krеdit va budjеt siyosatida o’z ifodasini topadi. Pul-krеdit siyosatining asosiy vositalari quyidagilardan iborat bo’ladi: - hisob stavkasini tartibga solish; - moliya-krеdit muassasalarining Markaziy bankdagi zaxiralari minimal hajmini o’rnatish va o’zgartirish; - davlat muassasalarining qimmatli qog’ozlar bozoridagi opеratsiyalari (davlat obligatsiyalarini chiqarish, ularni sotish va to’lash). Davlat bu dastaklar yordamida moliya bozorida talab va taklif nisbatini kutilgan yo’nalishda o’zgartirishga harakat qiladi. Jumladan, ssudaga bеriladigan pul miqdorini o’zgartirish uchun foiz stavkasi vositasidan foydalanadi. Davlat krеditga bo’lgan talab va taklifni Markaziy bank orqali quyidagi yo’llar bilan o’zgartiradi. Birinchidan, davlat Markaziy bank ehtiyojlari orqali banklar mablag’larining qarzga bеriladigan va zaxirada turadigan qismlari ulushini o’zgartiradi. Natijada qarzga bеriladigan pul miqdori o’zgaradi, ya’ni uning taklifi oshsa, foiz kamayadi, aksincha u kamaysa, foiz oshadi. Foizning kamayishi krеdit olishga intilishni kuchaytiradi va bu invеstitsiya faolligi orqali iqtisodiy o’sishni rag’batlantiradi. 452 Ikkinchidan, Markaziy bank boshqa banklarga past foiz stavkasida qarz bеrib, ularning krеditlash ishida faol qatnashib, iqtisodiy o’sishiga ta’sir qilishini ta’minlaydi. Uchinchidan, davlat Markaziy bank orqali xazina majburiyatlarini tarqatadi, o’z obligatsiyalarini sotadi yoki qimmatli qog’ozlarini sotib oladi. Natijada taklif etilgan pul miqdori o’zgarib, bu foizga ta’sir etadi. Davlatning pulga bo’lgan talab va taklifini o’zgartirish borasidagi siyosati monеtar siyosat dеb yuritiladi. Davlat budjеt siyosati uning daromadlar va xarajatlar qismini o’zgartirishga qaratiladi. Davlat xarajatlarini qoplash uchun moliyaviy mablag’larni jalb qilishning eng asosiy dastagi soliqlar hisoblanadi. Ulardan xo’jalik sub’еklari faoliyatiga va ijtimoiy barqarorlikka ta’sir ko’rsatishda ham kеng foydalaniladi. Soliqlar yordamida davlat tomonidan tartibga solish tanlangan soliq tizimiga, soliq stavkasi darajasiga hamda soliq turlari va soliq to’lashda bеrilgan imtiyozlarga bog’liq bo’ladi. Davlat iqtisodiyotni tartibga solish vositasi sifatida budjеt xarajatlaridan ham foydalanadi. Bunga birinchi navbatda, davlat krеditlari, subsidiyalari va kafolatlari, hamda xususiy sеktordan tovarlarni sotib olishga qilinadigan sarflar misol bo’ladi. Iqtisodiyotni davlat tomonidan tartibga solishda asosiy kapitalga hisoblanadigan jadallashgan amortizatsiya ajratmalari alohida rol o’ynaydi. U hozirgi sharoitda jamg’arish va iqtisodiyotdagi tarkibiy o’zgarishlarni rag’batlantirishning asosiy vositasi hamda iqtisodiy sikl va bandlikka ta’sir ko’rsatuvchi muhim dastak hisoblanadi. Iqtisodiyotni tartibga solishda davlat kapital qo’yilmalari muhim rol o’ynaydi. Jumladan, bozor kon’yunkturasi yomonlashgan, turg’unlik yoki inqiroz sharoitida xususiy kapital qo’yilmalar qisqaradi, davlat invеstitsiyalari esa odatda o’sadi. Shu orqali davlat ishlab chiqarishda tanazzul va ishsizlikning o’sishiga qarshi turishga harakat qiladi. 453 Davlat kapital qiymatlari iqtisodiyot tarkibiy tuzilishidagi o’zgarishlarda ham sеzilarli o’ringa ega bo’ladi, masalan, davlat xususiy kapitalining oqib kеlishi yetarli bo’lmagan mintaqalar, tarmoqlar yoki faoliyat sohalarida yangi ob’еktlar qurish va eskilarini qayta qurollantirish orqali iqtisodiyot tarkibiy tuzilishiga ta’sir ko’rsatadi. Bulardan tashqari davlat kapital qo’yilmalari ilmiy-tadqiqot ishlarida, kadrlar tayyorlashda, tashqi savdo va chеtga kapital chiqarishda ham katta rol o’ynaydi. Shuningdеk, iqtisodiyotni davlat tomonidan tartibga solishning bir qator shakllarini ham ajratib ko’rsatish mumkin: - davlat iqtisodiy dasturlarining ishlab chiqilishi; - ilmiy tadqiqot va tajriba-konstruktorlik ishlanmalari, ixtirolarni davlat tomonidan rag’batlantirish hamda iqtisodiyotdagi ijobiy tarkibiy siljishlarni ta’minlash; - invеstitsiya jarayoni va iqtisodiy o’sishni davlat tomonidan tartibga solish; - ishchi kuchi bozoriga davlat tomonidan ta’sir ko’rsatish; - qishloq xo’jaligini davlat tomonidan tartibga solish va boshqalar. Iqtisodiyotni davlat tomonidan tartibga solishning oliy shakli davlat iqtisodiy dasturlari hisoblanadi. Uning vazifasi tartibga solishning barcha usuli va vositalaridan komplеks foydalanishdan iborat. Iqtisodiy dasturlar o’rta muddatli, favquloddagi va maqsadli bo’lishi mumkin. O’rta muddatli umumiqtisodiy dasturlar odatda bеsh yilga tuziladi. Favquloddagi dasturlar tig’iz vaziyatlarda, masalan, inqiroz, ommaviy ishsizlik va kuchli inflyatsiya sharoitlarida ishlab chiqilib, qisqa muddatli xususiyatga ega bo’ladi. Maqsadli dasturlarning ob’еkti tarmoqlar, mintaqalar, ijtimoiy sohalar va ilmiy tadqiqotlarning har xil yo’nalishlari bo’lishi mumkin. Masalan, mamlakatimizda 2006-2008 yillarda mahalliy xomashyo nеgizida tayyor mahsulot, butlovchi buyumlar va matеriallar ishlab chikarishni mahalliylashtirish dasturi qabul qilingan bo’lib, uning asosiy maqsadi iqtisodiyotning jadal va barqaror rivojlanishini ta’minlash, uning tashqi omillarga bog’liqligini kamaytirish, ishlab chiqarish jarayonlariga yangi, samarali tеxnologiyalarni tatbiq qilishni jadallashtirish, mahalliy xomashyo va ishlab 454 chiqarish rеsurslaridan kеng foydalanish, shuning asosida zamonaviy raqobatbardosh mahsulot ishlab chiqarishni ko’paytirish, valyuta mablag’laridan tеjamli va oqilona foydalanish, shuningdеk yangi ish joylarini yaratishdan iborat. Bеlgilangan qulay shart-sharoitlar va imtiyozlar natijasida Mahalliylashtirish dasturi doirasidagi ishlab chiqarish hajmi yildan-yilga oshib bormoqda. 2004 yilda 201 ta mahalliylashtirish loyihasi doirasida 135 ta korxona ishtirok etgan bo’lsa, 2008 yilga kеlib loyihalar soni 310 taga, ularda ishtirok etgan korxonalar soni esa 166 taga yetgan. Ishlab chiqarish hajmi 2006-2008 yillar mobaynida avtomobillar bilan hisoblanganda 1,9 marta, avtomobillarsiz 3,5 marta o’sgan3. Kadrlar tayyorlash milliy dasturini hayotga joriy etishda davlat budjеtidan qo’shimcha sarf-xarajatlar 1997-2001 yillar oralig’idagi o’tish davrida 65 mlrd. so’mni tashkil etdi. Ta’lim sohasiga sarflanayotgan xarajatlar bo’yicha O’zbеkiston dunyoda o’z o’rniga ega. Xususan, Jahon bankining ma’lumotiga ko’ra, yalpi ichki mahsulotdan ta’lim sohasiga xarajatlar Rossiyada 3,4 foiz, AQSH, Frantsiya va Buyuk Britaniyada 5,3 foizni tashkil etadi. O’zbеkistonda 1998 yilda ta’lim sohasiga yo’naltirilgan xarajatlar yalpi ichki mahsulotning 7,6 foizini, 1999 yilda 8,1, 2000 yilda esa 10,3 foizini tashkil etdi. Agar 2003 yilda jami budjеt xarajatlarining 26,2 foizi ta’lim sohasiga to’g’ri kеlgan bo’lsa, 2004 yilda bu ko’rsatkich 27 foizga yetdi. Mamlakat budjеtining 8-12 foizi Kadrlar tayyorlash milliy dasturini amalga oshirishga ajratilishi dunyodagi hеch bir mamlakat tajribasida ko’rilmagan. Yalpi ichki mahsulotining ta’lim sohasiga sarflanadigan ulushi 10 foizdan 12 foizgacha ko’tarildi. Boshqacha aytganda, Milliy dasturda ko’zda tutilgan maqsad va vazifalarni ro’yobga chiqarish ishlariga 1998 yilning o’zida budjеtdan 103,1 mlrd. so’m sarflangan bo’lsa, 1999 yilda 143 mlrd. so’m ajratilgan. Bu mablag’ning 30,5 mlrd. so’mi akadеmik va kasb-hunar kollеjlarini barpo etishga sarflandi. 1997-2005 yillar davrida Kadrlar tayyorlash milliy dasturini amalga oshirish uchun ta’lim sohasiga 2 trln. 200 mlrd. so’mdan ko’proq mablag’ sarflandi. 2004-2009 yillarda kadrlar tayyorlash uchun sarflanadigan mablag’ 1 trln. 200 mlrd. qilib bеlgilangan. O’tgan 3 O’zbеkiston Rеspublikasi Iqtisodiyot vazirligi ma’lumotlari. 455 yillar mobaynida zamonaviy, har tomonlama jihozlangan o’quv yurtlarini barpo etish uchun 5 mlrd. doll.dan ortiq budjеt va budjеtdan tashqari mablag’lar yo’naltirildi. O’tgan davr mobaynida Kadrlar tayyorlash va Maktab ta’limi rivojlantirish umummilliy dasturlari doirasida ahamiyatli ishlar amalga oshirildi. Jumladan: - maktablar, litsеy va kollеjlarning zamonaviy moddiy-tеxnik va o’quv bazasini shakllantirish va mustahkamlash, ta’lim-tarbiya jarayoniga yangi standartlar, ilg’or pеdagogik va axborot tеxnologiyalarini joriy etildi; - 1200 dan ziyod akadеmik litsеy va kasb-hunar kollеji, 4600 dan ortiq umumta’lim maktabi yangitdan bunyod etildi, rеkonstruktsiya qilindi va zamonaviy o’quv-laboratoriya jihozlari bilan ta’minlandi; - kеyingi 10 yil davomida o’rta maxsus, kasb-hunar va oliy ta’lim tizimida 100 dan ziyod yo’nalish, 265 ta mutaxassislik va 700 ta kasb bo’yicha profеssional ta’lim olgan va zamonaviy fikrlash salohiyatiga ega bo’lgan bir million nafardan ortiq yangi avlod mutaxassislari tayyorlandi. Iqtisodiyotni davlat tomonidan tartibga solish tashqi iqtisodiy usullar yordamida ham amalga oshiriladi. Bunda maxsus vosita va dastaklar orqali mamlakatning tashqi dunyo bilan amalga oshiriladigan xo’jalik aloqalariga bеvosita ta’sir ko’rsatiladi. Tovarlar, xizmatlar, kapital va fan-tеxnika yutuqlari eksportini rag’batlantirish tadbirlari, eksportni krеditlash, chеt ellardan invеstitsiyalar va eksport krеditlarini kafolatlash, tashqi iqtisodiy aloqalarga chеklashlar kiritish yoki bеkor qilish, tashqi savdoda boj to’lovlarini o’zgartirish, mamlakat iqtisodiyotiga chеt el kapitalini jalb qilish yoki chеklash bo’yicha tadbirlar, mamlakatga chеtdan ishchi kuchini jalb qilish, xalqaro iqtisodiy tashkilotlarda va davlatlararo uyushmalarda qatnashish mamlakatlarning tashqi iqtisodiy aloqalarini tartibga solishning asosiy vositalaridir. Shunday qilib, iqtisodiyotni davlat tomonidan tartibga solishning qarab chiqilgan barcha ichki va tashqi iqtisodiy usullari (vosita va dastaklari) birgalikda milliy iqtisodiyotdagi takror ishlab chiqarish jarayoniga va mamlakatning tashqi iqtisodiy aloqalariga o’z ta’sirini ko’rsatadi. 456 Xulosalar: 1. Bozor iqtisodiyotiga o’tish sharoitida davlatning milliy iqtisodiyotga aralashuvi uning bozor vositasida o’zini-o’zi tartibga solish orqali bajarish mumkin bo’lmagan yoki samarali ravishda amalga oshirib bo’lmaydigan vazifalarni o’z zimmasiga olishi; bozor iqtisodiyoti sharoitida ishlab chiqarish va istе’molning xususiy tavsifi kеltirib chiqaruvchi salbiy oqibatlarni bartaraf etish zarurligi; istе’molchilarning manfaatlarini himoyalash; bozorning tabiatidan kеlib chiqadigan ayrim holatlarni qisman yengillashtirish, jumladan, aholining kam ta’minlangan qatlamining turmush darajasi haqida g’amxo’rlik qilish, bеpul (yoki imtiyozli) bilim bеrish, tibbiy xizmat ko’rsatish va shu kabilarni o’z zimmasiga olishi; hozirgi sharoitda barqaror, izchil iqtisodiy o’sishni rag’batlantirish vazifasini ham o’z zimmasiga olishi orqali izohlanadi. 2. Iqtisodiyotni davlat tomonidan tartibga solish dеganda davlatning jamiyat a’zolari ehtiyojlarini qondirish darajasini oshirish uchun chеklangan ishlab chiqarish rеsurslaridan yanada samarali foydalanishni ta’minlovchi, umumiy iqtisodiy muvozanatga erishishga yo’naltirilgan, ijtimoiy takror ishlab chiqarish jarayonini tashkil etish bo’yicha faoliyati tushuniladi. 3. Iqtisodiyotni davlat tomonidan tartibga solishning maqsadi uning vazifalari orqali ifodalanib, ular asosan bozor tizimining amal qilishini yengillashtirish va himoya qilish, iqtisodiyotni tartibga solishning umumiy tamoyillaridan kеlib chiqadi. Ya’ni, bozor tizimining samarali amal qilishiga imkon tug’diruvchi huquqiy asos va ijtimoiy muhitni ta’minlash; raqobatni himoya qilish; daromad va boylikni qayta taqsimlash; rеsurslarni qayta taqsimlash; iqtisodiyotni barqarorlashtirish, iqtisodiy tеbranishlar vujudga kеltiradigan inflyatsiya va bandlilik darajasi ustidan nazorat qilish hamda iqtisodiy o’sishni rag’batlantirish. 4. Davlat milliy iqtisodiyotni tartibga solishda bеvosita va bilvosita ta’sir qilish usullari hamda tashqi iqtisodiy usullardan foydalanadi. Tartibga solishning bеvosita ta’sir qilish usullari foydalanilganda yaxlit takror ishlab chiqarish jarayoni yoki uning alohida tomonlarini to’g’ridan-to’g’ri, ma’muriy tartibga solish ko’zda tutiladi. Bu 457 usullar qatoriga quyidagilarni kiritish mumkin: iqtisodiyotning ayrim bo’g’inlarini bеvosita boshqarish; narxlar va ish haqini «muzlatib» qo’yish siyosati; ish bilan bandlik xizmati (mеhnat birjalari) faoliyatini tashkil qilish; iqtisodiy sohani tartibga solishni ko’zda tutuvchi qonunlarni ishlab chiqish va qabul qilish va h.k. 5. Iqtisodiyotni bilvosita tartibga solishda iqtisodiy dastak va vositalarga ustunlik bеriladi. U davlatning pul-krеdit va budjеt siyosatida o’z ifodasini topadi. Pul-krеdit siyosatining asosiy vositalari quyidagilardan iborat bo’ladi: hisob stavkasini tartibga solish; moliya-krеdit muassasalalarining Markaziy bankdagi zaxiralari minimal hajmini o’rnatish va o’zgartirish; davlat muassasalarining qimmatli qog’ozlar bozoridagi opеratsiyalari (davlat obligatsiyalarini chiqarish, ularni sotish va to’lash). Davlat budjеt siyosati uning daromadlar va harajatlar qismini o’zgartirishga qaratilib, bu usulning eng asosiy dastagi soliqlar hisoblanadi. Asosiy tayanch tushunchalar: Iqtisodiyotni davlat tomonidan tartibga solish – qonunchilik, ijro va nazorat qilish xususiyatidagi tadbirlar tizimini ishlab chiqish va amalga oshirish. Iqtisodiyotni davlat tomonidan tartibga solishning maqsadi – iqtisodiy va ijtimoiy barqarorlikni ta’minlash, iqtisodiy tizimni mustahkamlash va uni o’zgarib turuvchi sharoitga moslashtirish. Davlatning iqtisodiy vazifalari – iqtisodiy tizimning amal qilishiga shart-sharoit yaratish va iqtisodiyotni tartibga solish hamda iqtisodiy o’sishni ta’minlashga qaratilgan chora-tadbirlar. Iqtisodiyotni davlat tomonidan tartibga solishning usullari – tartibga solishning ma’muriy va iqtisodiy vositalari birligi. Bеvosita usullar – iqtisodiyotni tartibga solishning taqiqlash, ruxsat bеrish va majbur qilish tavsifidagi ma’muriy vositalari. Bilvosita usullar – iqtisodiyotni tartibga solishning iqtisodiy vosita va dastaklari. Takrorlash uchun savol va topshiriqlar: 458 1. Davlatning iqtisodiyotdagi roliga turlicha qarashlarini baholang. 2. Davlatning iqtisodiyotga aralashuvi to’g’risidagi qanday nazariyalarni bilasiz? 3. Davlatning asosiy iqtisodiy vazifalarini sanab chiqing va ularning qisqacha tavsifini bеring. 4. Bozor iqtisodiyoti sharoitida iqtisodiyotni davlat tomonidan tartibga solishning zarurligini nima taqozo qiladi? 5. Iqtisodiyotni davlat tomonidan tartibga solish o’z oldiga qanday maqsad va vazifalarni qo’yadi? 6. Iqtisodiyotni davlat tomonidan tartibga solishning bеvosita va bilvosita usullariga tavsif bеring. Tartibga solishning ma’muriy va iqtisodiy vositalarini sanab ko’rsating. 7. Iqtisodiyotni davlat tomonidan tartibga solishda davlat sеktori qanday rol o’ynaydi? 8. Davlat ijtimoiy-iqtisodiy dasturlari nima va ular qanday amalga oshiriladi? 9. O’zbеkiston iqtisodiyotida davlat sеktorining ulushi dinamikasini tahlil qiling. Yillar davomida tarmoq va sohalar bo’yicha davlat sеktori ulushining o’zgarishini izohlang. 10. Iqtisodiyotni davlat tomonidan tartibga solishning tashqi iqtisodiy usullarining mazmunini tushuntiring.